Klootschgeetervereen Brookmerland ...so fung dat mal an

An een Augustsönndag 1928 satten `n Stück off twintig Mannlü bi Johann Heinrich Evers in sien Gasthoff "Nordstern" binanner. Se wassen Klootschgeeters un Bosslers un harrn all mennigmal mitnanner off tägennanner smäten. Nu sull d'r een Verein her un so reepen se de Klootschgeeterverein Brookmerland in't Läben. Vörsitter wur Johann Dirks, Kassierer Schwittert Schwitters un Schriftführer Johann Heinrich Evers.

Flietig wur nu üwt - "an de Bahnhofskolk", as Johann Heinrich Evers in uns Klootschgeeterleed riemt hett. All gau geev dat'n Priesschgeeten un de erste Wettkampf leet neet lang up sück wachten - smeeten wur um fief Mark. Van 1931 bit 1939 weer Fokke Janssen Vörsitter. In disse Tied wur de Heimstreck van't Rechtsupweger Straat na de Schoonorther Straat un dat Vereinslokal van't "Nordstern" na Schwarz up'd "Schottjer Piepe" verleggt. So um hunnert Mitglieder har de Verein intüschen, de fiefuntwintig Penning Bidrag betaalen mussen.

As 1939 de Krieg anfung, leep ok in uns Verein nix mehr. Aber all 1947 stunn de ersten wär up de Matt - off bäter geseggt up de Straat: Hilko Janssen, Ike Adena, Peter Wilken un Daniel Eilers weern dorbi. In de fieftiger Johren gung dat denn bargupp. De Verein nümde sück nu ""Goode Trüll", smäten wur up Sandkast na Leezdörp un Vereinslokal weer wär "Nordstern". Dirk Dirks, Vörsitter van 1957 bit 1965, verstunn dat besünners good, Jungvolk för dat Freesenspill to begeistern. Hum to Siet stunn Gerriet Freimuth as Kassierer, wat he bit vandaag bleeven is. 1965 geev dat mit Casjen Eilers een jungen Vörsitter. In sein Tied fung dat Punktschgeeten för de Bosslers an. Dordör harr'n de Vereine een grooten Toloop. Ok de Froolü kreegen Lüst an't Bosseln un moken mit. Unner Poppe Casjen as Vösitter van 1974 an geev dat groode sportliche Erfolge. De 1. Herrenmanschaft wur 1975 Verbandsmeister un steeg in de Landesliga up, wor se 1983 Meister worn sünd. De Frolü trukken na, 1980 wurn se Kreismeister un steegen ok in de Landesliga up, wor se bit vandaag bosseln.

Na tein Johr Vörstandsarbeit trä Poppe 1984 torügg. Hinrich Beninga , siet 1974 tweede Vörsitter, wur toon ersten Vösitter wählt. Ok he verstunn dat, uns Verein wieder vöran to brengen. De Jugendabteilung, van Thole Schüttler und Theo Aeilts upboot un van Johann Akkermann un Hermann Meints wiederföhrt, kunn anto all Johr mit een Kreis-, Landes- off Verbandsmeister upwachten. Ok de olle Herren, Männer II, Männer III un Männer IV hem'n mennig Meisterschaft na'd Schott halt. Tweemal kunn sück uns Verein as Sieger up de "Ostfreeslandpokal" indraagen.

Vandaag is "Goode Trüll", de siet 1996 van Manfred Kruse föhrt wort, mit sien över 300 Mitglieder een van de erfolgreichsten Vereine van't Landesverband. 19 Mannschaften, dorvann 5 Jugendmannschaften, nähmen an de Punktrunden deel. Fief Mannschaften, sovöl as van keen anner Verein, smieten in al Ligen van't Landesverband Ostfreesland. In Männer I, Männer II, Männer III, Frauen I un Frauen II is "Goode Trüll" siet Johren verträ'n.

Abers neet bloot in't Sportbereich is "Goode Trüll" good, ook dat Vereinsläben is in Rieg. Siet August 2000 hett uns Verein sein eegen Vereinshuus, up de al Mitglieder besünners stolt sünt. Mit vööl Arbeit hem de Mitglieder dat olle Müllerhuus in't Mühlenloog erhollen un för sück utbaut.

Wi hapen, dat immer wär junge Lü to uns kamen, de Pleseer an uns Freesenspill un uns Moderspraak hem un de mithelpen, dat an de nächste Generation wiedertogäven.

Engelline Kohlbacher, Geralt Freese